FRÉTTIR

Söfnun til styrktar Kraftasjóði Kvennaathvarfsins

Kraftasjóður Kvennaathvarfsins er nýstofnaður og er honum ætlað að efla konur og styrkja til náms og sjálfshjálpar.  Til þess að sjóðurinn megi nýtast sem fyrst og best blæs Zontaklúbbur Reykjavíkur til fjáröflunar og skorar á konur að sýna samtakamáttinn og leggja mikilvægu málefni lið með kjólagjöfum. 

Kjólahátíðin Konur og kampavín verður haldin á vegum Zontaklúbbsins laugardaginn fjórða nóvember kl. 12- 18 með uppboði, markaði og syngjandi sýningadömum í Söngskólanum í Reykjavík, Snorrabraut 54

Við skorum á konur að gefa kjóla á markaðinn og gefa gömlum kjólum líf og styrkja þannig konur til sjálfshjálpar og endurmenntunar því saman myndum við öflugan Kraftasjóð í þágu kvenna. 

Við leitum að kjólum sem eiga skilið að koma út úr skápnum, öðlast nýtt líf og um leið nýjan tilgang.

Við leitum að lífsreyndum kjólum, glæsikjólum sem geyma tækifæri og ævintýri, hvunndagskjólum með gleði í hverjum þræði, kjólum með fortíð sem eiga skilið framhaldslíf hjá nýjum eigendum. Dömulegar dragtir og dásamlegar múnderíngar eru einnig vel þegnar. 

 Allur ágóði rennur til KRAFTASJÓÐS Kvennaathvarfsins.

KJÓLAMÓTTAKAN verður í Söngskólanum í Reykjavík á milli 9.00-18.00 alla virka daga. 

Viðburðinn má líka finna á Facebook. 

Zontaklúbbur Reykjavíkur var stofnaður 16. nóvember 1941 og hefur því starfað í rúmlega 75 ár. Klúbburinn er hluti af Alþjóðasamtökum Zonta og fylgir markmiðum samtakanna að styrkja stöðu kvenna um heim allan.  

Tengiliðir verkefnis eru Sigríður Þóra Árdal, sími 660 7667sig(hjá)koggull.com og Harpa Harðardóttir sími 698 4056hunharpa(hjá)gmail.com

Landsfundur Zontasambands Íslands

Zontaklúbburinn Embla boðar til landsfundar Zontaklúbbanna á Íslandi laugardaginn 1. apríl 2017. Fundurinn verður haldinn í fyrirlestrarsal Þjóðminjasafns Íslands við Hringbraut og verður dagskrá fundarins samkvæmt lögum Zontasambands Íslands.

Þema fundarins verður helgað flóttakonum fyrr og nú, en vert er að minnast þess að margar af landnámskonum í upphafi Íslandsbyggðar voru flóttakonur þess tíma.

Meðal gesta á fundinum verða:

Eva María Jónsdóttir, miðaldafræðingur: Flóttakonur í fornum sögum.

Sigríður Víðis Jónsdóttir, upplýsingafulltrúi UNICEF á Íslandi höfundur bókarinnar ,,Ríkisfang ekkert“. Flóttakonur dagsins í dag. 

Einnig mun Ella B. Bjarnarson, Zontaklúbbnum Emblu flytja erindið: Litið til nágranna í vestri. 

Eftir hefðbundin fundarstörf verður gengið til hátíðarkvöldverðar á Hótel Sögu kl. 19

 

Líðan ungs fólks. Hvað er til ráða?

Þann 8. mars munu Zontaklúbbur Akureyrar og Zontaklúbburinn Þórunn Hyrna standa fyrir hádegisverðarfundi í samvinnu við jafnréttisstofu á alþjóðlegum baráttudegi kvenna.

Fundurinn er haldinn í andyri Borga við Norðurslóð – á Sólborgarsvæðinu frá kl. 11:45 -13:15

Smelltu á myndina til að fá nánari upplýsingar.

 

Málþing um stöðu kvenna með endómetríósu innan heilbrigðiskerfisins.

Zontakonur á Íslandi eru virkar í baráttu sinni þann 8. mars 2017 en sá dagur gengur líka undir nafninu rósadagurinn hjá Zontakonum. Nú í ár mun Zontaklúbburinn Sunna,  halda málþing til að efla vitund almennings á sjúkdómnum endómetríósa í samvinnu við samtök um endómetríósu. En yfirskrift málþingsins er Staða kvenna með endómetríósu innan heilbrigðiskerfisins: Lífsgæði og meðferðarúrræði.

Zontaklúbbarnir Fjögyn og Ugla styrkja málþingið og selja slaufur félagsins til styrktar málefninu. 

Málþingið fer fram í Hringsal Landsspítalans miðvikudaginn 8. mars kl. 16:15-17:45

Hér má finna upplýsingar um viðburðinn